فِکرِ اقبال کو رسوا نہیں ہونے دیں گے
قائدِ اعظم تُجھے دھوکہ نہیں ہونے دیں گے
اے وطن ہم تِری عزت کی قسم کھاتے ہین
تری ناموُس کا سودا نہیں ہونے دیں گے
ہم نے ٹھانی ہے کہ دجال سے بھِڑ جائیں گے
تیرا پرچم کبھی نیچا نہیں ہونے دیں گے
وہ جو اغیار کے دربار میں جا بیٹھے ہیں
ایسے غدار صف آرا نہیں ہونے دیں گے
جوق در جوق محبّانِ وطن نِکلیں گے
اپنے کپتان کو تنہا نہیں ہونے دیں گے
ساتھ عمران کے اُٹھا ہے نیا پاکِستان
حق کی تحریک کو پسپا نہیں ہونے دیں گے
اے وطن توُ نے تو دیکھے ہیں مہربان کئی
تُجھ پہ قابض ہوئے سرحد کے نگہبان کئی
تیرے ایوانوں میں وارد ہوئے ابلیس بہت
آئے فرعون گئے پھِر گئے ہامان کئی
غاصبوں نے تری حرمت پہ کئی وار کیئے
تیرے ملبوُس کے درپے رہے شیطان کئی
آج پھِر سے کئی رہزن ہیں مسلط تُجھ پر
نابلد عدل سے ہیں صاحبِ میزان کئی
جن کا مسلک ہے شہادت جو ہیں سرحد کے امیں
اُن کو شرمندہ کیئے جاتے ہیں نادان کئی
شبِ صیاد پہ طاری ہے نزع کا عالم
آئے گی صُبح لیئے نوُر کے طوفان کئی
باندھ کے سر پہ کفن ہاتھ میں قران لیئے
وحدتِ عالمِ اسلام کا عنوان لیئے
آہنی عزم لیئے قوتِ ایمان لیئے
درسِ قائد لیئے اقبال کا وجدان لیئے
حرمتِ سرورِ کونین کا فیضان لیئے
کلمۂ پاک کی، تکبیر کی گردان لیئے
اے وطن تُجھ کو مبارک ہو چمن میں تیرے
دیدہ ور ایک اُٹھا ہے نئے پیمان لیئے
اِک زمانہ ہمہ تن گوش ہو اُس کا یارو
دیکھتا ہے اُسے انگشت بدندان لیئے
لے کے اُٹھا ہے علم غیرت و خوداری کا
ایک عمران جلو میں کئی عمران لیئے
اے وطن پھِر ترے آباد دبستاں ہونگے
پھوُل مہکیں گے رنگا رنگ گلستاں ہونگے
روشنی ہو گی در و بام درخشاں ہونگے
تیرے آنچل ترے رخسار فروزاں ہونگے
پھِر ترے اہلِ ہوس دست و گریباں ہونگے
مُنہ سے بولیں نہ سہی دِل میں پشیماں ہونگے
تیرے دُشمن ترے غدار ہراساں ہونگے
تیرے قاتل ترے مجرم پسِ زنداں ہونگے
وہ ذہن ساز عہد ساز وہ عمران ترا
جِس کے آگے تو کئی اور بھی میداں ہونگے
مُجھ کو اللہ کی رحمت سے ہے امید حمید
پھِر مرے گھر میں شب و روز چراغاں ہونگے
