عکسِ مریم نہ سہی نقشِ صنم پہونچائیے
کُچھ تو سامانِ علاجِ غم بہم پہونچائیے
ریگزارِ دِل میں رودِ آب و گل ممکن نہیں
چلیئے کُچھ خوُنخوارخارِ صد ستم پہونچائیے
چھینیئے سارے قلم اہلِ قلم سے پھِر اُنہیں
اپنے اقلیمِ قلم میں سر قلم پہونچائیے
یوُنہی اخلاقاً ذرا میٹھی سی باتیں کیجئے
یوُنہی تفریحاً ہمیں مُلکِ عدم پہونچائیے
وصل کی لذت اجی کیجئے کِسی سے مستعار
اُن کو پہونچانے کو ذکرِ ہجرِ غم پہونچائیے
پھِر مرے ابلیس و انساں برسرِ پیکار ہیں
پاس سے اُٹھیئے سرِ کعبہ قدم پہونچائیے
مرتکب ہوُں جو کبھی میں التفاتِ غیر کا
مُجھ کو محفل میں حسینوں کی بھسم پہونچائیے
دیکھیئے میرے جنوں کی انتہا کوئی نہیں
مُجھ کو ضرباتِ رقابت کم سے کم پہونچائیے
اب دُعا ہے بارگاہِ ایزدی میں یہ حمید
سارے غم پہونچائیے دو چشمِ نم پہونچائیے
